Humberto Gonzali

Si pa saber d’un home, ente la estremadura de la so individualidá y de la historia perdida nel trescursu del mundu, afayamos la intensidá del so facer y l’ámbitu onde s’allugó, sedrémos pa llegar a la xusta comprensión del so ser. Y cuando la herencia qu’aportó durante la  esistencia terrena ye intensa abondo como pa modelar xiros propios nel devenir de la cultura, podemos dicir que’l mensaxe de la so humanidá tien un futuru en forma de veneru incandescente. Poques vueltes la vida fuera pa da-y a Xosé Antonio García momentos felices, pero sí que-y apurrió los sentimientos complexos que guañaron nos sos poemes.    

Xosé Antonio García

 El so gustu pol afondamientu nel llatín, griegu y árabe clásicos, de la qu’estudiaba Filoloxía Románica ya Hispánica, facilitó-y un conocimientu de primera mano d’una bayura obres enxertaes nes más granibles tradiciones de la lliteratura mundial, afayando de resultes d’ello un bagaxe cultural que pocos lliteratos n’asturianu teníen daquella y que, digámoslo tamién, d’entós p’acá pocos más se punxeren a la xera de tenelu. Y asina, cuando se publicara l’escelente Cuartetu de la Criación, de la man del Ayuntamientu de Mieres, dalgunos nun nos sorprendimos. Xosé Antonio yá anunciare, nes revistes “El cuélebre literario” y “Malku”, esi camín bayurosu, clasicista, frutu de la propia y dura esperiencia y d’un legáu tan vixente y presente como l’aire o l’augua. Esi llibru yera poesía xurdiendo a golfaraes, con una vitalidá reivindicativa de la esperanza, por más que los sos paisaxes enxertaos ente l’amor y el duelgu trescurríen davezu pelos silencios que la dulda xeneraba. 

 Xosé Antonio García y la so poesía yeren fíos d’un llugar y d’un tiempu, del Mieres d’aquel entós y d’unes décades onde’l particular mundu marcáu a la vera del Caudal (el Ríu Grande de los antiguos) produció nomes importantes pa la cultura d’esta Asturies de nós.  Él fue pa danos una imaxe rigurosa de la humanidá y les munches contradiciones que la puen conformar, ensin deformaciones infecundes nin artificios vacios. Xuntó con metáfores directes y pensamientos del más llográu llirismu la escuridá qu’añera nos requexos del alma y la premonición del desaniciu. Dempués del so segundu poemariu, Alcordances d’un home muertu, Xosé Antonio García morrería físicamente pero diba camudar a residente nesa eternidá primixenia qu’amarra a los asturianos contra la tierra que nos perpetúa.   

Cuando pienso en Xosé Antonio alcuérdome siempres d’una llarga conversa nocherniega que caltuviéremos, sofitaos na barra d’un pub, sobre’l platonismu na poética de Garcilaso de la Vega y la capacidá del clásicu pa describir la señardá que la mesma esistencia produz. Diéremos-y vueltes y vueltes a los versos que decíen no me podrán quitar el dolorido sentir, si ya primero no me quitan el sentido, y el casu ye que nun pudimos da-y acabu satisfactoriu a los argumentos qu’ellí nacíen. Emplazáramonos pa otra nueche, na mesma barra de pub, pero’l destín nun lo quixo permitir. Más pudo la muerte y, demientres díbemos pa contra’l nuevu sieglu, paecía que tres d’ella diba venir l’olvidu. Nun sé, o quiciás sí, por qué pasamos tantos años ensin perconocer la relevancia de Xosé Antonio pa la nuestra lliteratura, por qué al tiempu que se lloaba a lo bono, pero tamién a lo espantible como si fuera tamién bono, escaecíemos la so esistencialista voz. Felicitémosnos pol actu de xusticia que supón la dedicatoria de la Selmana de les Lletres a la so persona y a la so obra. Pero cuando ésta pase, que nun quedemos otra vegada ensin remembranza d’aquel  “doloriu sentir”, el qu’amó la muerte y escribió versos con nomes de duelgu pa vengase del home onde habitaba.