Humberto Gonzali

Andreu Nin

La izquierda institucional n’Asturies, ye dicir, el PSOE ya IU, nunca nun foi dalgo con pedriguí democráticu. Nesta estaya del espectru politicu siempres prestaron por demás les maneres, digámoslo con terminoloxia más actual, tendentes a lo bolivariano. Ye lo que tenemos, pa qué vamos engañanos. Los socialistes tienen por dirixentes una rara mezclienda de fíos y ñetos del réxime, franquista, y d’ex de les estremaes families comunistes, más un variáu muestrariu de representantes d’eso que se dio en nomar pijoprogres. De los comunistes qué falar, si nun son nin p’aparentar una mínima crítica a dictadures que sían de la so cuerda, como ye’l casu de la cubana. 

Estos díes,   onde pa  tanto da l’asuntu del patrimoniu d’un fíu de falanxista, el señor José Bono, el diputáu Llamazares tuvo a bien empobinar los restos estatales de la so formación a un nuevu ridículu. Nun se-y ocurrió otro que ponese a pedir el valtamientu de la Llei d’Amnistía de 1977. Nada raro nesi inventu peculiar consistente n’amazcar al Partido Comunista de tola vida con una sigla y dellos grupinos satélites. Vamos, como mui d’otru tiempu. Pero lo que nun diz, si ye que lo pensó, el diputáu Llamazares, ye que si pretende ‘sentar al franquismu nel banquiyu’, por aquello de que ciertos crímenes nun prescriben nunca, pue tar favoreciendo que se xulgue a PSOE y PCE polos sos propios crímenes. Ye lo que tien esta izquierda de nuestro, tan desnortiao ya indocumentao. 

Tovía esti llunes, nuna tertulia radiofónica fecha n’emisora bien poco sospechosa de derechismu, interviníemos trés representantes de les fuerces polítiques con presencia nel  Ayuntamientu xixonés. Aparte de ser yo mesmu, voceru del Partíu Popular, l’únicu qu’usó la llingua asturiana nes sos intervenciones, cosa que digo como indicativo pa dalgunos, los ellí presentes punxímonos a falar del presuntu prevaricador Baltasar Garzón y de la permansuñada Memoria Histórico. Como un servidor nun ye de los que conocen la historia pela vía del parte oficial del zapaterismu, y llegaos al momentu de falar de la tristaya realidá que suponen les fueses con muertos de la represión, fíce-yos alcordanza de qu’amás de los agora reivindicaos tovía queden en sucu munchos de los d’otra parte. 

Llanté enriba la mesa’l casu de los esqueletos afayaos n’Alcalá d’Henares nel cuartel de la BRIPAC, de los qu’esti Gobiernu nun quier saber un res. Falé de la suposición, mui bien basada, sobro la presencia ente aquellos restos óseos del que fuera llider del troskista POUM, Andreu Nin, el mesmu al que xente del PCE y axentes soviéticos pulgaron vivu y después aperriyaron cuando’l Madrí de checa y paséu nocherniegu. La moza que s’estrenaba por IU solo pudo volver a repetir, como un mantra, la consigna del día alrodiu de les cuites del ciudadanu Garzón. Manuel Muruais, que fuera va un tiempu conceyal polos socialistes, amosaba nel rostru cómo-y mancaba que-y frañeren el discursu con retayos d’una Historia a la que los sos collacios de partíu quieren h.ispia-y la Memoria. Con tou ello, meyor fadría’l señor Llamazares dexando pa prau los sos esperimentos parlamentarios. El guerracivilismu, el mesmu que tanto-y peta a la nuestra izquierda, enxamás nun condució a nada bono. Nin pa los unos, nin pa los otros.