Humberto Gonzali

Muria del Chao Samartín

Dixera va un tiempu Enrique Múgica Herzog, que la democracia nun ye’l silenciu, ye la claridá con que s’esponen los problemes y la esistencia de medios pa resolvelos. Enrique Múgica ye ún de los más intelixentes militantes que tuvo, dende enantes los tiempos de la transición, el socialismu español. Lo tristayo ye que s’acollumbra como una rara islla, llantada metanes una mar de mediocridá y sectarismu qu’apina al so partíu. Yo, como lliberal que soi, tengo a bien y en reduñes del bon criteriu, aceptar siempres lo bono venga d’onde venga y ser pa perconocer la non esistencia de la verdá absoluto. D’ehí que tantu ciñu-y tenga a la cita de Múgica Herzog. Y siguiendo esi filu afronto los socedíos, increyibles por demás, que tamos viendo en Grandas de Salime.

Les nueves últimes sobro los movimientos del catalanoparlante y, per agora, director del Muséu Etnograficu de Grandas de Salime, el señor Cuesta Toribio, en compaña del xeólogu Jesús Jordá, más conocíu por ser fíu del so padre, l’insigne prehistoriador Francisco Jordá Cerdá, llévennos a pensar que les coses pinten más que mal pal nuestru patrimoniu cultural. Si se confirmen delles xestiones, feches por estos ciudadanos tan afines a la gobernanza arecista col envís de contratar arqueólogos nuna vecina comunidá autónoma, taríemos en delantre d’un problema de los gordos, no humano, no social y no político. Y si, como dalguién a lo normal bien informáu me narrara, ente los contratables anden un piñu d’espertos con sensibilidá bloqueira, díbemos alluganos nun escenariu de durísimes belixerancies.

Cómo non, pa poner a trabayar a xente nun sitiu onde yá tien xera, va once años, otru equipu, fai falta quitar a dalgún. Más claro, imposible. El casu ye que les escavaciones de Chao Samartín empobinábales Ángel Villa Valdés, con tola profesionalidá del mundu y con bonos resultaos p’amosar a la sociedá científico. Pero Ángel Villa, que nin ye catalanoparlante nin ye bloqueiro, tuvo a bien opinar sobro’l cese de José Naveiras Escanlar y dicir, n’abiertu romance, qu’aquello yera una cacicada. Entós, tolos mecanismos del pensamientu únicu que tien manaderu na conseyería de Cultura, mangárense a ‘depurar’ elementos díscolos. Esto ye lo que tenemos, una purga d’acuerdu a la meyor praxis estalinista, qu’amás pue acabar dándo-y cancha nel nuestru Occidente a  grupos que de vieyo anden emperrándose en negar l’asturianidá de los conceyos ente’l Navia y l’Eo.

En verdá, más llamentable exemplu de que los xestores culturales de les conseyeríes uvieínes nun conocen Asturies, nun lu hemos topar. Tanto Mercedes Álvarez, como los que respalden les sos ocurrencies, como los que son cómplices necesarios, compórtense como marcianos abducíos por una modernidá que nun ye otro que provincianismu, indocumentación y despreciu a la xente asturiano y a les sos tradiciones y cultura. Los demócrates qu’amás de selo exercemos d’ello enveredamos a la práctica l’acertada cita d’Enrique Múgica Herzog, nun nos callamos, identificamos al problema y a los sos axentes y plantegamos los medios p’afaya-y igua. Y falando d’iguar, la salida a esta llamorgal pasa porque la señora Álvarez torne pa la so casa, porque’l señor Cuesta desarrolle les sos habilidaes de catalanoparlante ellí onde la llingua de Pompeu Fabra sía l’autóctona, y porque’l señor Jordá tresllede les sos ínfules redencionistes a llatitúes más combayones col revisionismu zapateril. Grandas de Salime ye Asturies, masque dellos tengan suaños neoyorquinos, y nada hai más sagrao pa un asturianu de bien que’l país de los sos mayores.