…masque non polo qu’él taba naguando. Nos manuales correspondientes, el so nome tará venceyáu a un aténticu güelpe contra l’estáu del bientar nel nuestru estáu. Él ye’l primer presidente de Gobiernu español que tuvo l’aquel de conxelar les pensiones, contra lo que la llei determina, y l’otru aquel de rebaxar los salarios de los trabayadores públicos nun 5%. Y amás, ello fadrálo obligáu polos requerimientos imperativos de mandatarios estranxeros y non como consecuencia de la crisis económica, pues l’aniciu d’esti desmán ta nun déficit que xeneró l’actual inquilín de La Moncloa a comuña coles mentes ‘pensantes’ del so partíu, a sabiendes de les consecuencies y col envís de ganar elecciones previu engañu a la ciudadanía. En resume, Zapataro resultó ser un gallu ensin espolón y un frívolu incapaz. De tou ello tendremos, por desgracia, abondo pa falar. De mano, namás un recordatoriu a dellos ‘pensadores’ llocales que tuvieron a bien estrenase en querencies p’hacia la ceya circunflexa ciertu mes de marzu, na carbayona cai Manuel Pedregal, y que va bien poco inda mentaben al recién descubiertu asesín del gastu social como, y cito testualmente, el meyor presidente de la democracia. En considerando la so parte alícuota de responsabilidá nel encumamientu d’esti gobernante allugáu nel desgobiernu, permítanme ustedes un pequeñu biecu, propiu -por repetíu- de la izquierda plural:
¡Sían coherentes!, pídan ustedes perdón a los funcionarios y pensionistes poles gafures que cola so aidanza a toos nos llegaren.
Comentarios recientes / Comentarios de recién