Humberto Gonzali

Figareo, conceyu de Mieres, 1961

Fui miembru de l’asociación Conceyu Bable y profesor de llingua asturiana.

Nomáu secretariu de la Xunta pola Defensa de la Llingua Asturiana en 1985, onde coordino numberoses acciones de protesta pola denegación de derechos llingüísticos.

Xunto con Juan Bonifacio Lorenzo Benavente y Xicu Monteserín fundo en 1988 Orbayando, revista asturiana d’información, que codirixo hasta l’añu 1990.

Nel 1990 creo con otros autores asturianos l’asociación Escritores y Traductores en Llingua Asturiana (ETLLA) de la que fui’l so presidente.

En 1992 empobino los trabayos que llevaron al envíu al gobiernu d’Asturies d’una Propuesta de Llei d’Usu y Protección de la Llingua Asturiana. Entamo contactos con Galeusca, promoviendo l’aconceyamientu en Xixón de la directiva d’esta entidá onde se pide l’ingresu de los escritores asturianos, midida pa la que se llogra l’apoyu de l’Associació d’Escriptors en Llengua Catalana.

Presidí dempués, dende la so nacencia en 1996, la Sociedá d’Escritores en Llingua Asturiana (SELLA). Promoví la IV Xunta d’Escritores Asturianos celebrada en Villaviciosa en 1996, y promoví y fui’l coordinador de la V Xunta d’Escritores Asturianos fecha en Lluanco en 1998.

En 2006 creo  l’Arribada,  foru de lliteratura que tien la so sede nel conceyu de Xixón, y que tamién desarrolla actividaes n’otros conceyos asturianos.

Milito nel Partido Popular, siendo integrante de la so Xunta Local xixonesa y presidente de la Comisión de Cooperación y Solidaridá.

Dende avientu de 2007 soi Asesor del Grupu Municipal Popular.

Represento a esti partíu nel Conseyu Asesor de la Llingua Asturiana del Ayuntamientu de Xixón.

Dende ochobre de 2005 soi miembru de la Xunta Rectora de la Fundación Municipal de Cultura, Deportes y Universidá Popular de Xixón. Igualmente, soi Miembru de númberu de representación nel Rel Instituto de Estudios Asturianos.

Presido’l Círculu Lliberal, asociación d’ámbitu asturianu que tien como oxetivu l’actividá cultural alrodiu del pensamientu lliberal.