Cuando l’aspirante a artista o intelectual tien poco o nada qu’aportar, tira siempres de la transgresión simplona y fata. Si la obra nun val un pimientu nun importa. Con provocar, eso sí dende la progresía, abasta pa tener un nome nesi mangaráu de vanidaes y cretinismu qu’apina la “cultura” oficial. ARCO, esa feria del arte onde tou val, dende lo espléndido a lo perrero, y que tanto-y da la xenialidá como’l tránsitu vital de les piedres y les sos circunstancies, nun diba fuxir de nenguna d’eses zunes cimeres qu’añeren nel maxín de tola izquierda aburguesadamente combativo d’Europa: l’anticlericalismu y l’antisemitismu. Esti añu correspuénde-y a Eugenio Merino, a lo que paez artista plásticu, facer la gracia. La so aportación a la Historia del Arte nesta edición de la feria ARCO ye “Escalera al cielo”, según él una “reflexión sobre la relixón”, que consiste básicamente en llantar a un musulmán agacháu con un cura católicu enriba, rezando de rodielles, y un rabín sobro ésti. Completa la escena, nun llateral,  un subfusil Uzi que caltién la menorá (candelabru hebréu de siete brazos). Lo que se diz mui artísticu’l resultaú. Cómo non, los amigos de lo social pero con tarxeta oru anden encantaos, présta-yos pola vida esta ayalga creativa. Por prestar, de seguro que tamién habrá dalgún neonazi empixáu cola composición, y pue qu’hasta dalguna escritora de tertulia feminista, medio postulante de la violación de monxes por “sudorosos y viriles” milicianos, tenga pie pa un cuentín o asemeyao. El casu ye que a esta triba de controversiales  onde afayamos al Eugenio Merino de turnu nun-yos da, pongamos el casu, por pintar, esculpir o fotografiar a un Mahoma dau a los sos faceres maritales que, como cualquier documentáu sabrá, avezaben a situase de toes toes neso que conocemos como pederastia. Equí l’arte de la provocación esvanezse. ¿Y por qué sedrá? diría un inocente.