Nel diariu El País anden emperraos nuna cruzada contra aquelles canales, a lo que paez non progres, que tán xorreciendo la so audiencia na más que viniente TDT. Persabemos que la falta perres pue llevar a la xente a facer lo que n’otra situación nun se fadría. Conozse la delda del grupu PRISA, astronómica por demás. Y ye del común que nin el periódicu nin el grupu editorial tienen agora la esclusiva nes preferencies de la gobernanza socialista.

Anda la cosa demasiao repartida como pa satisfacer los intereses crematísticos de la que fuera, va bien de tiempu, la cabecera del ‘réxime’. El casu ye que, más allá de la babayada que supón l’ataque simplón a los medios que nun comulguen con ún, nel diariu El País nun son pa estremar lo que tienen per delantre.

Viviendo como viven, semeyo al partíu de la so vieya querencia, nel fracasu ideolóxicu, atesteronen na reprobación con llamatos que, si furrularen cuantayá, nel sieglu qu’entamemos va poco resulten ridículos y lleven a la desafección y refugu de munchos de los sos llectores. Lo de etiquetar de ‘ultres’, ‘fascistes’, ‘franquistes’, ‘racistes’ y otres ayalgues p’acometer al competidor nes idees (y no económico) tien un pelligru; el d’acabar encetando de materia fanático al propiu sectarismu.

Asina vemos como nes anteriores categoríes descalificantes yá entren hasta periodistes y tertulianos que son periodistes y tertulianos de so. Y per esti camín namás llograrán que se considere un estigma social decir que yes d’El País. O dicho con otru xeitu, y si los numberos colloraos nun lu lleven enantes al desaniciu, nun ha tardar el día que sía’l El País lo ultra y lo facha.