N’Asturies.com -19/12/2006. El gobiernu del presidente Rodríguez (Zapatero pa los amigos) sigue emperráu na tramitación de la so Ley de Memoria Histórica, y ello col envís, polo menos l’oficial, de da-yos reconocimientu y reparación a toles víctimes de la Guerra Civil y del franquismu. Rara finalidá la d’esti executivu, pues cuantayá que n’anteriores llexislatures, y gobernando unos y otros, asoleyárense estremaes midíes llegales qu’iguaron precisamente eses reivindicaciones. Y si dalguién nun quier dar esto por seguro, nun tien nada meyor pa camudar la presunción que’l consultar les ediciones correspondientes del BOE. Arriendes d’ello, sacantes la soledá parlamentaria de los socialistes cola so llei, lo único real que vemos estos díes ye cómo’l “gobiernu del talante” lleva 17 meses ensin perfacer les idemnizaciones a los españoles que sofrieren privación de llibertá nos nomaos Batallones Disciplinarios de Soldados Trabajadores, onde penaron bien de combatientes del bandu republicanu. Estes ayudes tán paraes hasta que s’aprebe la tan mansuñada Ley de Memoria Histórica, onde s’inclúin, lo que son les coses, eses indemnizaciones que nun lleguen pola mor de la tramitación de la llei. Vamos, un contrasentíu más pa la llarga llista de les bayures polítiques del socialismu en gobernanza. Yo nun sé si tendrá priesa’l gobiernu por tirar p’alantre cola so iniciativa, pero paezme que’l trénsitu vital de munchos beneficiarios nun da pa demasiáu retrasu. D’otra parte, cola so inagualable capacidá pal enguedeyu, el presidente Rodríguez invoca na so propuesta la tábula rasa pa l’apoloxía de los bandos de la guerra y del franquismu. Bien, pero al querer reparar a los republicanos tamién dexa abierta la puerta a la reparación de les víctimes de los escesos de la República. Igual que taríemos empobinaos a la retirada nes plaques de cais d’aquellos nomes de franquistes reconocíos, tendríemos de manganos na xera d’esbrozar el callexeru de nomes como Dolores Ibarruri, Brigadas Internacionales, Riego, etc. Eso ye lo malo de nun saber llexislar, y por sectarismu ya ineptitú, abrir un furacu per onde podría entrar, pongamos por pasu, la reclamación de les cuites ensin aclarar de Paracuellos del Jarama o Rivas Vaciamadrid, tristayos exemplos de matanza planificao. Porque home, nada más facil qu’alcordar col mayor partíu de la oposición (si ye qu’anguañu hai otru) un testu de compromisu, si lo que se quier ye reparar y reconocer. Pero esta hestoria de la Ley de Memoria Histórica diríase que quier otra cosa; dalgo como revisar y reinventar, dalgo como ganar nun mundu virtual la guerra que se perdió nel mundu real. Y esto yá ye otra hestoria. Nesta España onde too se mide pola esbilla de la propia ideoloxía sóbranos muncha tochez, y fai falta xeitu a maza. Apoyar ciegamente esta llei pol aquel de da-y entierru dignu a los muertos, ye ñegar la realidá. Pa ello nun ye necesario dixebrar otra vuelta a la sociedá en dos estayes, por más qu’haya una tercera, la inmensa mayoría, qu’asiste a esti alderique cola más significativa de les indiferencies. Col alcuerdu pue entamase un procesu sensatu, ensin demagoxa, de torna a la dignidá d’aquellos calabres cobraos indignamente. Y sobremanera, col alcuerdu, sedría más fácil recuperar y reconocer a los muertos de la tercera España, a los muertos de la España real, de la España que soportó la bestialidá de los estremismos de derecha ya izquierda que nos entrullaron nuna inmisericorde degollina civil. Escribo estes llinies mientres lleo un trabayu sobre un pasaxe de la hestoria asturiana que m’afecta mui cerca, los episodios que se dieron nel cercu republicanu sobre l’Uviéu nacional. Como toos tenemos güelos, y non solo’l presidente Rodríguez, dalgunos vemos difícil d’encuenyar la nuestra pequeña memoria familiar nesa memoria hestórica de la “izquierda peculiar”. El 23 de febreru de 1937, al atapecer, el teniente Severino González, del Batallón Asturias númberu 9, muerre aperriyáu nuna alambrera qu’arrodia un puestu d’ametralladores de los nacionales, allugáu nuna cota del Picu del Paisanu. El teniente González, güelu míu por más señes, escribiere unos díes enantes de morrer a la so muyer indicándo-y la imposibilidá de ganar la guerra, ente otres coses porque cuando te manda un comisariu políticu que nun estrema un fusil d’una escoba, y cuando los cabezaleros del proletariáu en llucha son más puteros y clasistes que los fascistes, nada hai más seguro que too se tien perdío. Neses lletres, el teniente González aldovinaba la propia muerte. Esi día de febreru dirixó’l so ataque caberu , suicida y estúpidu como les estúpides órdenes del comisariu, y quedó na alambrera sumíu na escuridá de los años. El camarada que valió de testigu ocular pa la certificación de la muerte perdió un güeyu na atopada. El calabre acabó en vaya usté a saber que fueyu. Y el nietu, si quixera entamar una busca pa afaya-y un entierru dignu, diba tenelo perdifícil. Al teniente González mátenlu les bales franquistes, les órdenes republicanes, y la seguranza de lluchar por dalgo que yá nun yera xusto. Entós, ¿a qué llei se tendría d’acoyer la bisarma del teniente González?; él, que nin perdió nin ganó.