La descomanda cantidá de ciudadanos que s’afayen fuera del mercáu llaboral suponen pa la nación una realidá dramática. Munchos d’ellos ven cómo escosen los subsidios ensin que xurdan nel horizonte espectatives clares d’ameyoramientu. Y hasta agora mesmo, lo único que tien fecho l’inquilín de La Moncloa ye entamar comisiones a tente bonete ya inventase conceyos ensin cuentu, inútiles por demás pero, eso sí, coles oportunes ruedes de prensa, nes que nada nuevo nun se diz y siempres dalgo se quier vender. Ente tol mangaráu de xuntes, la última ocurrencia que tuvo la gobernanza socialista foi la xuba desnortiada del IVA. Cualaquier ciudadanu con un mínimu sentiu común, que ye’l menos común de los sentíos pal PSOE, persabe que nun esiste cosa más regresiva, falando de les perres de la xente, que l’alza xeneralizao d’impuestos. Y nesto tamos. Los socialistes afirmen, bien ufanos, que nagüen por activar la nuestra economía y, miren per ónde, nun se-yos ocurre otro qu’enfotase en gravar el consumu directu de los españoles. Les consecuencies que tendrá esti incrementu dafechamente innecesariu vamos sofriles toos, y ello porque se fadrán notar de sópitu nel aumentu los precios. Lo que ye lo mesmo, que col envís de frenar la recesión va provocase inflación. La verdá, ye complicao maltratar con mayor emperramientu a la yá más que mancada situación económica.