Nun voi yo decir nada nuevo a estes altures que yá nun se dixera no tocantes al fechu del vergoñosu cese de José Naveiras Escanlar, Pepe El Ferreiro, como director del Muséu Etnográficu de Grandas de Salime, qu’él mesmu creara cuantayá, d’aquella cuando esto del patrimoniu etnográficu yera pa cuasimente tol mundu asuntu de cuatro alloriaos.

Nun voi facer recordanza d’esi datu, a lo que paez poco relevante pa la gobernanza socialista, qu’espeya un beneficiu nel Muséu de munchos miles d’euros pues, d’alcuerdu cola verdá oficial, la xente del matemáticu metíu a conducator bien nos indicó a la ciudadanía que les coses había que les cambiar porque ellí too diba más que mal, y nun ha ser qu’un representante de la derechona como servidor diga lo contrario, que toos somos conocedores del dogma históricu qu’alluga a la razón siempres nel llau izquierdu.

Y nun voi, Dios o los referentes laicos al usu me llibren d’ello, a tar a la gueta de miseries humanes nel determín del ciudadanu Eustaquio Revilla Villegas, a la sazón alcalde  mediopensionista y progre del conceyu onde tienen l’aniciu parte los socedíos masque, permítanme ustedes una maldá con aspiraciones a falcatrúa, tengo pa min que col añu venideru habrá grandaleses a maguyu dispuestos a otorga-y al rexidor municipal d’ínfules zapateriles tantes opciones a repetir mandatu como, faigamos remembranza, diéran-y al tamién compañeru de puñu y capullu José Luis Castelao Díaz. Leer el resto de la entrada »