Nada nun hai peor pal bientar d’un estáu y de los sos ciudadanos que l’usu partidista, per parte del gobiernu, de les instituciones d’esi mesmu estáu. Nel Reinu d’España los socialistes nun lleven faciendo cosa distinta dende que tocaren poder en 1982. El tránsitu de Felipe González pela gobernanza supunxo un rosariu d’inmoralidaes de toa triba que condució a dellos altos cargos de los sos executivos camín de la cárcele y, lo que ye más espantible, con dalgunu por responsabilidaes en terrorismu d’estáu. Por más demagoxa que gaste’l progresismu de salón la realidá ye como ye. Solo a xente socialista acabaron venceyando a muertos enterraos con una capa de cal vivo. Nestos tiempos el frívolu presidente José Luis Rodríguez Zapatero dedícase, con tol enfotu del mundu, a la xera de tornar a la España democrática nun semeyu del réxime qu’anguañu oprime a los venezolanos. Pal PSOE l’estáu tien de tar al so serviciu, pal socialismu español nun hai llugar pa la discrepancia. Na so trayectoria foi amosando una total falta d’escrúpulos a la hora d’afitase nel “Pozu Moqueta”. Daba igual pautar cola dictadura de Primo de Rivera, incitar a la revolución cuando perdía elecciones como en 1934, alliase col estalinismu na guerra civil o aprovechase, per aciu de los medios de comunicación afines, del mayor atentáu terrorista de les últimes décades. Ye esa trayectoria la qu’esplica l’empléu reiteráu de la Fiscalía contra’l principal partíu de la oposición, induciendo operaciones a les que se da gran trescendencia mediático y que-yos resulten, na inmensa mayoría de los casos, un chascu absolutu. Nel patéticu asuntu de los traxes de Francisco Camps l’inventu tampoco nun funcionó bien pa los socialistes, que decidieron vertebrar la so estratexa d’oposición a un PP valencianu que los arrolla elección tres elección recurriendo a maneres de república bananera. Y mientres Zapatero, esi “Gran Timonel” xenerador de cuasi cinco millones de paraos, sigue emperráu n’allumar basoria onde nun la hai, cientos d’escándalos protagonizaos por militantes del PSOE enllenen páxines de los periódicos. Tovía ayeri la muyer d’Ovidio Blanco, esi ex arquitectu municipal del Xixón de Tini Areces, decía que’l terrenín del yá famosu pelotazu de Cabueñes (609.000 euros, señores, 609.000) sirviera pa plantar unes zrezales que se comieren los caballos. Bucólico y pastoril lo d’esta izquierda. Pero bono, ¿nun dixo el señor Buendía, conseyeru con ademanes d’alcaldable, qu’Ovidio Blanco yera “una bellísima persona y un gran profesional”? Pues eso, que tovía van tener razón aquellos que decíen lo de “África entama nos Pirineos”.